Asturies comprométese contra los tresxénicos

El Gobiernu asturianu firmó ayeri xueves el so compromisu cola asociación de rexones de la UE que quieren sacar alantre la so agricultura ensin el concursu nella de los Organismos Modificaos Xenéticamente. La conseyera asturiana de Mediu Rural y Pesca, Servanda García Fernández, firmó la entrada formal d'Asturies a esta rede na que yá tan otres 26 rexones comunitaries, ente elles Asturies y Euskadi, úniques del Estáu Español na rede.

Según la conseyera, Asturies quier cola entrada nesta rede facer un apueste pola producción agrícola de calidá y les denominaciones d'orixe, fuera del modelu que representen los cultivos tresxénicos. La declaración de la que yá ye parte Asturies ficiérase en Florencia (Italia), col fin d'afalar la creación de planes específicos que resguarden los cultivos tradicionales contra la llegada de los tresxénicos , que ta demostrao que puen contaminar árees de munchos kilómetros alredor del llugar onde se semen.

La Conseyera defendió que'l modelu de desarrollu agrícola d'Asturies nun casa col d'otros llugares onde se practica una agricultura estensiva de grandes superficies, y esplicóqu'ella nun tenía una "postura radical" contra los tresxénicos, qu'entiende que puen ser válidos en determinaos contestos, pero pidió que se faiga un debate sobre los modelos de desarrollu y aplicación d'estos organismos y afirmó que la rede de rexones va intentar facer "presión" pa que l'agricultura europea se desarrolle por otres víes distintes a los tresxénicos. La difícil convivencia en faces qu'atiesten les unes coles otres de tresxénicos y cultivos convencionales o ecolóxicos ye agora mesmo ún de los puntos nos que más ta trabayando la conseyera asturiana,que dixo que nun taba conforme cola normativa que ta preparando'l Ministeriu de Agricultura, que nun garantiza la coesistencia ente tresxénicos y otres agricultures.

De cualquier manera, la declaración de Florencia nun pue ser más qu'una declaración d'intenciones y configuradora d'un grupu de presión, pero la comisaria europea d'Agricultura, Mariann Fischer Boel, yá s'encargó ayeri de recordar que ye imposible que les rexones prohiban pola so cuenta los tresxénicos, en cuantes que la llexislación europea nun-yos da a les rexones autonomía pa decidir sobre esi estremu.