El PSDG pide que la Xunta de Galicia defenda’l gallegu n’Asturies

El Grupu Parlamentariu Socialista nel parlamentu gallegu presentó'l pasáu mes de marzu una propuesta non de llei pa que la Xunta de Galicia promueva'l gallegu ente los 80.000 habitantes del Navia-Eo, Bierzo y parte de Zamora y Cáceres.

La propuesta que presentaren les parlamentaries socialistes Natividad González Laso, Laura Seara Sobrado y el diputáu Manuel Luis Rodríguez González diz qu'hai más de 80.000 falantes de gallego falantes repartíos pel occidente d'Asturies, el Bierzo, occidente de Zamora y dellos llugares de Cáceres.

Pa defender la gallegofonía d'esti colectivu, el PSOE gallegu pide cuatro midíes . En primer llugar, el PSDG pide que s'apauten alcuerdos coles instituciones educatives y culturales d'Asturies, Llión, Zamora y Extremadura pa que'l gallegu pase a formar parte de los programes d'actividaes culturales y educatives d'estes zones. La segunda iniciativa de la propuesta pide que los circuitos culturales que promueva la Xunta de Galicia lleguen tamién hasta estos territorios. Reforzar la rellación ente los gallego falantes d'estos llugares y "el país" ye otru de los puntos del programa, proponiendo pa ello los socialistes gallegos que s'apauten programes de vacaciones y d'intercambiu pa toles edaes col oxetu de que la xente d'estos llugares pueda visitar Galicia.

El testu de la propuesta remembra que la Real Academia Galega yá tien entre los sos académicos representantes de les cuatro zones y faen un llamáu a qu'otres instituciones asuman una actitú asemeyada siguiendo la iniciativa académica, faciendo referencia espresa a que'l Conseyu de la Cultura Gallega enxerte tamién representantes d'estos territorios. El PSOE- PSDG cree que ye preciso "apoyar" l'actitú de los que tan contribuyendo al espardimientu del gallegu neses zones y facer estensivu'l so llabor al restu de la xente.