El fueu abrasó más de 4.000 hectárees en marzu

El conseyeru de Xusticia, Seguridá Pública y Rellaciones Esteriores, Francisco Javier García Valledor, dixo ayeri nel trescursu d'una visita que fexo a los conceyos de Tinéu y Cangas del Narcea que nos trés primeros meses del añu Asturies rexistró 958 incendios que quemaron 4.266 hectárees de matos y de viesca. Marzu ye'l responsable d'estes cifres tan altes, y ye que solamente nesi mes declaráronse 847 fueos, un númberu que Valledor calificó de "descomanáu".

Sicasí, la estadística fai de menos les cifres d'estos trés meses, que nun tan ente les peores de los diez años últimos, anque tampoco ente les meyores. Por poner un casu, el mes de marzu del 1997 declaráronse 853 fueos, una cifra asemeyada a la d'anguaño, pero cola diferencia de que naquel mes escuru perdiéronse ente les llaparaes un total de 8.471 hectárees, lo que quier dicir que la superficie media qu'afectó cada incendiu foi muncho más grande que la d'anguaño. D'otra manera, p'alcontrar el primer trimestre más gafu de la década no tocante a incendios nun tenemos que dir más p'allá del 2002, añu en que nos trés meses qu'abren l'añu quemaron en total 14.900 hectárees.