Lali García pide la ellaboración de "polítiques efeutives pa llograr la igualdá ente muyeres y homes"

"Lali Garcia, cabeza de llista al Congresu de los Diputaos por UNIDÁ declaró esta selmana nun actu electoral el deséu del so partíu de que se ""faigan polítiques efeutives pa llograr una igualdá real ente muyeres y homes, más allá de midíes altisonantes y efectistes que namás valen pa mazcarar la realidá"". La vocera de la coalición criticó les aiciones del gobiernu asturianu en materia d'igualdá, sorrayando que ""los datos asoleyaos polos sindicatos CC.OO y UXT sobre'l trabayu de les muyeres n'Asturies son demoledores"" porque nellos ""ponse de manifiestu que les asturianes cobren un 34% menos qu'ellos, trabayen menos hores y ocupen los puestos peor pagaos""

Pa Lali García, esti datu ""ye verdaderamente clarificador y escandalosu en cuantes que vien a poner de manifiestu les consecuencies que plantea l'actual modelu de sociedá onde la muyer s'incorpora al mercáu llaboral, pero onde se-y desixe que nun dexe les obligaciones sociales que por tradición y educación tien entá asignaes"". Dende'l so puntu de vista ""esta obligación fai que se diseñen toa mena d'estratexes y planes d'igualdá pa tentar de facilitar la doble xornada de les muyeres, que nun faen otro qu'acentuar entá más esta desigualdá de condiciones ente unes y otros"".

Pa finar la candidata d'UNIDÁ afirma que ""yá valió d'aceutar dobles obligaciones, de polítiques públiques como la reducción d'impuestos a les muyeres trabayadores que nun faen más que llograr l'efectu contrariu al supuestamente buscáu. Hai que facer un apueste por midíes verdaderamente efeutives como'l permisu de paternidá intresferible"", al empar que se saquen alantre ""midíes que faigan por iguar estes desigualdaes como bien podíen ser la obligatoriedá de protocolos d'actuación nes empreses énte les diferentes formes de discriminación, al igual que'l fomentu de midíes pa reequilibrar les plantiyes, sobre manera en puestos o sectores con menor índiz d'ocupación femenina"""