L´Acesol fina la temporada del descensu con derrota

L´Acesol Voley La Calzada finó un ciclu de cuatro temporaes nel cume del voleibol con una nueva derrota nesti casu escontra l´Agrupación Deportiva Pinguela (0-3) nun alcuentru ensin trescendencia nenguna, en cuantes que nengún de los equipos xugaba ná y dambos zarraren la temporada delles xornaes enantes. L´A. D. Pinguela presentábase nel Palaciu los Deportes de la Guía col oxetivu d'ameyorar la duodécima posición del añu pasáu, llográndolo al quedar ayeri na novena posición definitiva sumando cinco victories más que la temporada pasada.


El primer xuegu entamó iguláu hasta'l 4-4, momentu nel que les gallegues ficeron un parcial de 0-4, gracies al saque directu de Luciana do Carmo y dos aiciones siguíes de Noelia Sánchez. L'Acesol reaccionó y púnxose a un puntu (8-9) pero un nuevu parcial de 0-5 volvió a enanchar la diferencia a seis puntos (8-14). L´Acesol reduxo a dos puntos (17-19), continuando hasta 19-21. Na siguiente aición un remate fuera de Bárbara Rodríguez fizo que Roberto Furgón pidiere tiempu muerto, pero un fallu na recoyida por parte de Crsitina Pardo amplió la renta gallega a cuatro puntos (19-23), que nun recuperó l´equipu local, finando esti primer xuegu del llau foriatu por 21-25.


El segundu xuegu emprimó con dos errores siguíos del Acesol (0-2). Con 3-6, un parcial local de 4-0 igualó a 6. Asina entróse nuna fase del alcuentru onde lo más destacao foi la igualdá, con diferencies escases pa caún de los equipos. Una finta na rede d'Estefanía Sanguiao punxo una separtación de dos puntos pal Acesol (17-15), que se mantuvo hasta'l 18-16, momentu en qu'apaeció Luciana do Carmo, que con trés puntos siguíos tornó'l partíu (18-19). Con 20-22, Bárbara Rodríguez igualó a 22 gracies a dos acciones consecutives y nun momentu inspiráu del so xuegu adelantó al Acesol (23-22). Esto fizo que Carlos Carballo, técnicu foriatu, pidiere tiempu muerto. Noelia Sánchez, capitana de les gallegues, punxo per delantre al so equipu (24-25) y anque Vita Prichepa empató a 25, pero una nueva imprecisión de les locales dio-y un balón de xuegu al Pinguela (25-26), qu'aprovechó tamién un remate falláu na rede por Daniela da Silva.


L´Acesol nun tiró la toalla y escomencipió mandando nel entamu del tercer xuegu (4-1), gracies sobre too a les aiciones de Marija Zoric. El conxuntu fabril mandaba con diferencies mínimes d´un puntu pero'l Monforte llogró un parcial de 0-5, pasando del empate a 10 a un 10-15, fundiendo la moral del cuadru local. La diferencia amplióse hasta un 11-18, que yá nun diben poder salvar les xixoneses. Bábara Rodríguez fizo l'últimu puntu local, finando l'alcuentru con un 18-25, dempués d´un remate de Daniela da Silva a la rede.
Con esta derrota, l'Acesol Voley, pieslla una dolorosa temporada que fina col descensu de categoría y con graves problemes económicos que ponen en peligru'l futuru del club, dempués de tar cuatro temporaes na Superlliga, na que quedó novenu (2003-2004) y terceru na Copa la Reina (2001-2002), na que foron organizadores.

ALLINiACIONES :

Acesol Voley La Calzada: Estefanía Sangiao, Marija Zoric, Janesca Scharnovski, Daniela da Silva, Bárbara Rodríguez – equipu d´entamu –. Noelia Sánchez (llíberu), Noelia Franco y Cristina Pardo.

A. D. Pinguela Monforte: Verónica Contreras, Luciana do Carmo, Beatriz Bejega, Noelia Sánchez, Juliana Escobar, Mirtha Uribe – equipu d´entamu –. Erika Carvalho (llíberu), Olivia González y Diuvane Belletti.

Parciales: 21-25 (25 minutos), 25-27 (27 minutos) y 18-25 (22 minutos).
Árbitrios: Teófilo Guijarro y Rubín Martín (Castiella y Lleón).