Nené Losada Rico presenta un nuevu poemariu

La poetisa de L.luarca Nené Losada ye la responsable de "Fueyas que reverdecen" títulu que fai el númberu 9 de la colección "Tiempu de Cristal", qu'edita l'Atenéu Obreru de Xixón. "Fueyas que reverdecen" ye una una antoloxía de la obra d'esta veterana autora, acabante de recibir el distingu de fía predilecta de L.luarca xunto con dellos poemes ínéditos.

La presentación d'esta obra va correr a cargu de l'atenéu obreru y va a facese nel local de la Cai Covadonga de Xixón onde tien la so sé esta entidá. Ello va ser el 7 d'Abril, a les 7,30 de la tarde. L'escritor Antón García, especialista na obra de la escritora, va presentar l'actu.

Nené Losada ye l'alcuñu lliterariu de Carmen Losada Rico, nacida en Lluarca el 10 de payares de 1921. De formación autodidacta, Nené Losada amuésase como una temprana escritora de relatos y poemes en castellano. Entamando tiempu más tarde a facelo na llingua del so llugar, utilizando formes poétiques mui cercanes a les de la poesía oral popular. La so obra tien como modelu al Padre Galo, al que conoció de neña, y emparenta, non sólo por tar escrito tamién en dialectu occidental, cola de la poeta Eva González de Llaciana; amosando a una bona recoyedora de la lliteratura oral y capacitada pa componer con estos materiales tradicionales una obra de fondu caláu líricu y d'una prestosa eufonía. En 1992 recoyó bona parte de la so obra en versu nel volume "Cantares valdesanos", n'edición de Consuelo Vega, que se completa col nuevu llibru poéticu apaecíu en 1997 col títulu de "Entre apigarcios".