L'asturianu sigue presente nel alderique eleutoral

"Si hai unos díes yera'l cabeza de llista del Partíu Popular por Asturies, Gabino de Lorenzo, el que declaraba nuna entrevista del selmanariu ""Les Noticies"" el so posicionamientu favoratible a la oficialidá del asturianu, ye agora Pilar Fernández Pardo, presidenta del Partíu Popular en Xixón, la que se posiciona a favor d'una oficialidá ""ensin obligatoriedá"". Les declaraciones foron feches, na nueche d'ayeri, nel programa qu'empobina'l periodista Juan Neira nel Canal 10 de televisión.

La tercera na llista al Congresu por Asturies declaró que'l compromisu de la so formación cola llingua y la cultura asturiana quedó amosáu cola incorporación de conocíos asturianistes en cargos de responsabilidá dientro del partíu.

D'otru llau les respuestes del restu de formaciones a esti nuevu posicionamientu del Partíu Popular nun se tán faciendo esperar. El voceru nacional de Bloque por Asturies, Rafael Palacios, espresaba en rueda de prensa la so desconfianza haza les declaraciones de De Lorenzo, recordando que tres la figura del voceru popular s'alcontraben otros nomes como Zaplana o Acebes. D'otru llau los voceros de la Coalición UNIDÁ, Lali García ya Ignaciu Llope, criticaben abiertamente les declaraciones de De Lorenzo pidiendo'l votu asturianista, tachándoles de ""electoralistes y oportunistes"", al empar que manifestaben que ""los asturianistes yá tienen n'UNIDÁ una fuercia plural que representa'l votu útil asturianu"". Dende la otra formación de calter nacionalista, Andecha Astur, espresaben nestos díes el so compromisu cola llingua pente medies de la homologación de les papeletes al Congresu y al Senáu emitíes en llingua asturiana.

L'asturianu sigue d'esta mena, y a dos díes del fin de la campaña, siendo tema d'alderique y defensa por parte de los más de los partíos asturianos."