Personalidaes de la cultura asturiana van encabezar la manifestación

El Conceyu Abiertu pola Oficialidá ta acabante de dar a conocer les personalidaes que mañana van tar na pancarta que va abrir la manifestación que va salir a les 12:30 de la estación de RENFE d'Uviéu en demanda del reconocimientu de la oficialidá del asturianu na reforma del estatutu d'autonomía.


El CAO yá tien disponible la llista de personalidaes que mañana van tar al frente de la manifestación. Anque son más de cien les organizaciones de toa triba que firmen el manifiestu del Conceyu, con un gran protagonismu de partíos políticos y sindicatos na llista de compromisarios de la plataforma, nun intentu de da-y a la convocatoria un calter más abiertu y evitar protagonismos políticos, les cares que van abrir mañana la manifestación van ser les de personalidaes del mundu cultural asturianu non venceyaes a opciones polñítiques o sindicales. Asina, y a falta de posibles cambeos d'última hora, van tener pola pancarta d'apertura de la manifestación el Presidente del Real Uviéu Club de Fútbol Manuel Lafuente, el caderalgu d'historia medieval de la Universidá d'Uviéu Javier Fernández Conde, l'escultor José Alba, el cantante del grupu "Nuberu" Chus Pedro, Ramón Blanco, del grupu musical "Los Berrones" y José Antonio Lobato, del grupu teatral "Margen" nuna llista qu'incluye tamién a Lisardo Lombardía, miembru del Conceyu d'Estudios Etnográficos "Belenos". Anque la organización contaba con poder poner al frente de la manifestación a dalgún de los deportistes de renome que soscribieron el manifiestu del CAO, tolos que s'intentaron contactar teníen pal día de mañana distintos compromisos que-yos torgaben la presencia na manifestación.