Vicente Díaz saca'l so discu númberu venti

Col títulu de "Aires del norte" ta na cai dende'l 25 de febreru l'últimu de Vicente Díaz, veteranu de la música n'Asturies y nomináu esti añu al premiu al meyor cantar n'asturianu de la SGAE.

Vicente Díaz vuelve con doce cantares col estilu inconfundible del cantante asturianu, anque con dalgunes sorpreses, como'l pequeñu pasu que da'l cantante pel rap nunos de los cantares. Como yá ye vezu los más de los temes del discu tán compuestos y iguaos por Pepín Robles, que vuelve a tar nomináu esti añu col cantar "La Pola de Siero" interpretáu por Vicente Díaz nos premios de la música de la SGAE, Pepín Robles yá ganó nel 2003 col tema "Nunca Mais" interpretáu pol desapaecíu Manolo Morán.

El discu grabóse nos estudios "La Factoría" de Piedras Blancas, y edítalu la "Fonográfica Asturiana". Nél collaboraron una llista llarga de músicos como ente otros Laura Díaz (fía de Vicente Díaz): voz y coros, Rubén Álvarez: guitarra acústica, David Varela: percusión, Manu León: guitarra, Pepín Robles: curdión, Javier Díaz: gaita, Juan Flores cola xiblata y saxo altu o Kiko Flores nel saxo tenor.

Pa conocer más detalles del discu convidamos a los nuesos llectores a visitar la páxina web de Vicente Díaz, onde amás puede descargase un tema d'esti nuevu discu, "Lejos de Asturias".