García Arias acusa al gobiernu de “tar montando una contraacademia”

L'ex - presidente de l'Academia de la Llingua fizo durísimes declaraciones nel actu de presentación del mapa de conceyos qu'edita la institución académica

L'actu de presentación del Mapa de Conceyos d'Asturies tuvo un protagonista especial na persona de Xosé Lluis García Arias. Acabante de presentase'l mapa, el filólogu y profesor de la Universidá d'Uviéu tomó la pallabra aclariando que falaba "esclusivamente a títulu personal". Nun clima revueltu tres de les declaraciones na mesma mañana del día d'ayeri de la Conseyera de Cultura nes que-y reclamaba a l'ALLA que rebaxare les sos esixencies y qu'abandonare los masimalismos, Arias retrucó con durísimes pallabres.

El profesor afitó'l discursu d'Ana Cano no tocante a l'autoridá de l'ALLA en materia toponímica. Según García Arias "la toponimia ye parte de la onomastica y esta parte de la llingüística, polo tanto la institucion qu'entiende nel tema llingüisticu solo pue ser l'ALLA porque asina queda consagrao nos sos estatutos". Arias punxo un simil pa exemplificar lo qu'entiende que ta pasando al dexar tola autoridá en toponimia en manes de la Xunta de Toponimia. SegúnArias, "el que la Xunta de Toponimia apaute les formes de los topónimos ye como si l'Academia pretendiere tener el votu técnicu nuna comisión d'ordenación del territoriu afitando ella les llendes esactes de cada llugar per delantre del criteriu de los especialistes".

Arias emplazó directamente a la Conseyera Ana Rosa Migoya na cuestión de la toponimia, de la que dixo que "tien na so mano el desgraciar definitivamente la toponimia o entamar a sentar les bases p'arreglala y pa ello nun-y tien namás que respetar la llegalidá y a l'ALLA como institución". Arias acusó directamente al Gobiernu asturianu de "tar montando una contraacademia que tenga l'autoridá nel aspectu normativu de la toponimia, lo que resulta gravcisimo". Anque la inteción de montar esa contraacademia vendría directamente del executivu, Arias nun dulda en calificar negativamente l'actuación del responsable de política llingüística Ramon d'Andrés, al qu'acusó de "tar faciendo'l xuegu nesi contestu y ser amás deslleal cola Academia, na que participó nel nivel normativu y en concreto na ellaboración del documentu ·"nomes de conceyos, parroquies y llugares del Principáu d'Asturies polo que nun s'esplica que sía elli agora'l primeru en querer dinamitar esi documentu" Respective a los demás filólogos que trabayen con d'Andrés, Arias esplicó que-y merecíen "tol respetu del mundu" pero acusolos de tar atribuyéndose "funciones que nun-yos correspuenden".