Cangas del Narcea da-y el preste al so serviciu de normalización

El Plenu ordinariu del mes de febreru del Conceyu de Cangas del Narcea, que se celebró ayeri, dio de pasu la creación del serviciu de normalización del conceyu, una iniciativa que propunxere'l Grupu Socialista nel conceyu a primeros del pasáu mes d'avientu, como yá adelantare nel so día Asturies.com y que'l plenu aprebó a lafin colos votos al favor de PSOE Izquierda Xunida y URAS. El Partíu Popular, que na Comisión de Cultura votare al favor de la creación del serviciu, abstúvose dempués na votación en plenu, una decisión que sorprendió a los demás grupos con representación na casa conceyu.

D'otra manera, esta mañana a les doce y media preséntase en Paraes (Nava) el Conseyu Comarcal de Política Llingüística de la Mancomunidá de la Comarca de la Sidra, un órganu al traviés del que se quier favorecer la participación de colectivos y asociaciones de la Comarca nos procesos de normalización social del usu del asturianu, la so protección y espardimientu y que va ser complementariu al Serviciu de Normalización Llingüística de la Mancomunidá.