"Les señes d'identidá hai que defendeles penriba de too"

"Gabino de Lorenzo, candidatu del Partíu Popular por Asturies al Congresu, siguió na mañana del llunes en Ribeseya'l so percorríu electoral pel oriente asturianu, acompañáu nesti casu pol actor Arturo Fernández y apoyáu por abondos afiliaos del PP de la fastera. De Lorenzo reafirmó na rueda de prensa posterior al actu les pallabres que pronunciara'l día anterior en Cangues d'Onís, manifestando que ""les señes d'identidá de la rexón hai que defendeles penriba de too"", asina sorrayó que ""la llingua y la cultura ye lo que nos diferencia, la nuestra identidá, los nuestros raigaños"". En referencia direuta al asturianu, l'alcalde d'Uviéu entrugó ""agora resulta que n'Andalucía van imponer el catalán nes escueles ¿y nosotros vamos dexar que muerra la forma na que s'espresaben los nuestros antepasaos porque dalguién diga que ye una aldeanada?""

De Lorenzo adelantó asina mesmo que'l pieslle de la so campaña va tener llugar nel Auditoriu d'Uviéu a les 20.00 hores del vienres, cola representación d'una obra teatral ""d'humor español ya ironía asturiana"" na que tará acompañáu pol actor Arturo Fernández. De Lorenzo nun quixo cuntar más sobre'l conteníu de la mesma, namás que ""el guión ta escribiéndose y nun se pue adelantar más, sólo que va ser respetuosa, simpática, fresca ya irónica"".

D'otru llau, no tocante a la propuesta del candidatu popular sobre'l Plan Estratéxicu de Ferrocarriles p'Asturies, De Lorenzo recordó que'l candidatu del PSOE, Álvaro Cuesta, tachó la so iniciativa de poner en marcha un tren d'alta velocidá pa comunicar l'aeropuertu coles tres ciudaes asturianes, como una idea de ""Chigre"", sorrayando'l númberu ún del PP que ""dos díes dempués el colexu d'inxenieros d'Asturies presentó un proyectu d'un tren d'alta velocidá asemeyáu al plantegáu por mi, polo tanto tan de chigre nun será la mio idea"", aseguró."