Telecable puya con Telefónica pola telefonía del Principáu

L'alministración autonómica saca a concursu'l so serviciu de telecomunicaciones. El concursu, dixebráu en trés paquetes, que correspuenden a les estayes de telefonía fixo y datos, internet y telefonía móvil, tien un importe total de cerca de 48 millones d'euros, y por elli compiten la multinacional Telefónica, que se presenta a los trés paquetes de servicios, y la empresa asturiana Telecable, que se presenta a dos de los trés paquetes en que ta dixebráu el concursu.

Telecable nun se presenta a la estaya de telefonía móvil, pero la empresa que dirixe Roberto Paraja enfótase nes sos posibilidaes p'algamar los contratos de telefonía fixo y d'internet. El primeru d'ellos ye la tayada grande del concursu, con un importe d'alredor de 40 millones d'euros, y por elli compiten Telefónica y Telecable, que se presenta al traviés d'una Unión Temporal d'Empreses xunto con Auna y British Telecom, mientres que'l de servicios d'internet ye d'un millón y mediu d'euros y el de telefonía móvil, al que namás se presenta Telefónica, de 6 millones.

El Principáu tien de resolver el concursu nun plazu aprosimáu de quince díes. Casu de ganar la empresa asturiana cualquiera de los dos contratos a los que se presenta, ello diba suponer un reblagu grande pa la filial d'Hidroeléctrica del Cantábrico. Fontes de Telecable declararon qu'ello podría suponer un aumentu de plantiya grande y evidentemente, de facturación, que podría llegar prácticamente a doblase en casu de conseguise'l contratu pola telefonía fixo. Ello ye qu'anguaño'l cliente públicu más importante de Telecable ye l'Ayuntamientu d'Uviéu, que tien contratada dende últimos del 2004 y hasta l'añu 2008 la so telefonía fixo con Telecable por un importe de 96.000 euros.