Chus Pedro, Vicente Díaz y Skanda, finalistes de la Meyor Canción n’Asturianu nos Premios de la Música de la SGAE

Los temes "Agora sal a baillar" de Chus Pedro, "La Pola de Siero" de Vicente Díaz, y Sangre d´ochobre, de la formación Skanda, tan acabante de salir escoyíos finalistes de los IX Premios de la Música na categoría de Meyor Canción n'Asturianu.

El ganador definitivu va conocese'l próximu 22 d'abril, na ceremonia d'entrega que va tener llugar nel Palaciu Municipal de Congresos de Madrid nuna gala que va tresmitir en directo la primer canal de Televisión Española.

La llectura de finalistes fízose esta mañana na sé central de la Sociedá Xeneral d'Autores y Editores (SGAE). Los Premios de la Música son una iniciativa de l'Academia de les Artes y les Ciencias de la Música pa reconocé-yos el so llabor a los creadores más destacaos nes distintes estayes profesionales del sector musical.

Según s'informa dende la SGAE, los finalistes a la Meyor Canción n'Asturianu escoyéronse al traviés d'una primer vuelta de votaciones, que se desarrolló ente'l 17 de xineru y el 13 de febreru y na que taben convidaos a participar más de 5.000 votantes. La segunda votación, que va dar como resultáu al ganador, da aniciu'l 7 de marzu y remata'l 3 d'abril.