El Conseyu de Gobiernu aprebó’l Plan de Normalización

El llargamente esperáu Plan de Normalización del Asturianu ta acabante d'aprebase en Conseyu de Gobiernu. Baxo'l títulu "Plan de normalizacion sociollingüística del asturianu 2005-2007" el documentu inclúi finalmente según esplicóla portavoz del gobiernu Ana Rosa Migoya "68 midíes de promoción del idioma asturianu". Estes midíes son válides tamién pal gallego-asturianu, que va gozar de tratu idénticu al asturianu en toles actuaciones.

Ana Rosa Migoya aclarió que'l testu del plan íntegru nun va tar disponible hasta que nun pase tol trámite burocráticu internu en Conseyu de Gobiernu, un trámite que va llevar alredor d'una selmana. En faciéndose esto, el plan va dase a conocer en tolos sos términos nuna rueda de prensa especial na Conseyería de Cultura. La Conseyera sí adelantó esta mañana que'l plan va implicar "prácticamente a toles conseyeríes" entamando en toles estayes de gobiernu polítiques normalizadores con especial atención tamién a la presencia del asturianu nos medios de comunicación y a la normalización de la toponimia a tolos niveles. La Conseyera resumió l'espíritu del plan refiriéndose a elli como una ferramienta que pretende "frenar el retrocesu nel númberu de falantes d'asturianu" y facer que l'asturianu "dexe de ser una cuestión polémica como lleva siendo dende va años".

A la entruga d'Asturies.com na rueda de prensa de dempués del Conseyu de Gobiernu sobre la dotación económica del plan, Ana Rosa Migoya faló d'una cantidá que va tar "alredor de los 25 millones d'euros" pal periodu de trés años de duración del mesmu, anque pidió que s'esperare a la presentación oficial del plan pa conocer les cantidaes esactes y como van repartise

El plan vien con más d'un mes de retrasu sobre la fecha que la mesma Conseyera de Cultura comprometiere y cerca d'un añu dempués de facese la so primer redacción . Distintes fontes del executivu autonómicu comentaren a Asturies.com que les negociaciones pa rematar tolos términos del documentu duraron hasta l'últimu momentu, llegándose a un alcuerdu que dexa finalmente satisfeches a toles fuerces con representación en gobiernu, como reconoció la conseyera na so comparecencia pública d'esta mañana al acabar la sesión del Conseyu de Gobiernu. falando testualmente Migoya de la so "gran satisfacción pol gráu de coincidencia que s'alcanzó ente toles organizaciones representaes nel Gobiernu".