L'ADBA pasó penriba del Cáceres tres una selmana mui complicada

"L'ADBA ganó en Cáceres pol resultáu de 51 a 81 dempués d'una selmana mui enguedeyada pal equipu avilesín, pues la Federación dio-y por perdíu'l partíu que nun pudiera xugar escontra'l Bembibre poles baxes y amás quitó-y un puntu. Con esti resultáu les asturianes son quintes coles mesmes victories que l'Estudiantes de Madrid, pero con un puntu menos pola sanción federativa. El prósimu partíu n'Avilés va ser escontra'l llíder, el Pío XII de Santiago Compostela, que vien de perder col Estudiantes.

El partíu asitióse del llau avilesín nel tercer cuartu nel qu'algamaron un resultáu de 10 a 33. Al descansu llegóse con un 31 a 29 pa les locales, pero nesi tercer cuartu les avilesines dieron un golpe d'autoridá y finaron el cuartu con un 41 a 72. Asina con esti resultáu alloñen a les extremeñes na clasificación, que de ganar punxéranse a una victoria de les asturianes. Gran partíu de Jerica Watson (con dobles figures -25 puntos y 15 rebotes-, 1 asistencia, punxo 4 tapones, ficiéron-y 7 faltes personales y tuvo una valoración de 42 puntos), y tamién hai de destacar a Paula Ballvé (17 puntos, 8 rebotes y 1 asistencia).

Ficha técnica: Iniexa Cáceres 2016: Alicia González (8), Nereida Ramírez (13), María Antonia Hernández (6), María del Carmen Ruíz (15) y Alejandra Man zano (2). Tamién xugaron: Ana Brandia (5), Jara Salgado (2), Kathleen Morrison y Belén Mejías. ADBA: Verónica Alonso (9), Paula Ballvé (17), Anna Boleda, Zora Skrabalova (11) y Jerica Watson (25). Tamien xugaron: Orinta Kavaliauskaite (4), Carla González (9), Iratxe Cabrera (4), Jana Statienova y Debora Abreu (2).

Árbitrios: Luis Bey y Francisco Rastrollo.

Na ADBA nun hebo xugadores eliminaes por cinco faltes personales y nel Cáceres foi eliminada Jara Salgado.

Partíu de la décimo novena xornada de la Lliga Femenina 2 Grupu A xugáu nel Pabellón Municipal Juan Serrano Macayo de Cácers.

Parciales per cuartos: 19-20, 12-9, 10-33 y 10-19."