L'Ayuntamientu de Carreño refuga la moción escontra la Regasificadora

"El Plenu del Ayuntamientu de Carreño, na sesión celebrada'l xueves 28 de febreru, refugó colos votos de PP, PSOE y URAS y l'abstención d'IU-BA-LV, la moción presentada pol conceyal d'UNIDÁ-Andecha Carreño, y númberu tres al Congresu na candidatura d'UNIDÁ, Santiago Artime, escontra la construcción de la Regasificadora d'El Musel.

UNIDÁ-Andecha Carreño, que presentaba la moción, asina como UICA, dieron un votu favoratible, demientres que tanto'l PP como'l PSOE caltuvieron la so postura negativa énte lo que pal conceyal Santiago Artime ye ""nun dar razones y facer simplemente lo que-yos manden a nivel estatal, ensin querer dir a la contra"". Artime señaló asina mesmo que, dende'l so puntu de vista, ye ""triste qu'Asturies seya l'únicu país dientro l'estáu español onde estos proyeutos xeneren unanimidá ente los tres partíos con más presencia n'Asturies"" al empar llamó l'atención sobre'l fechu de que ""esti proyeutu reciba tamién l'apoyu de los sindicatos mayoritarios d'Asturies"".

Dende UNIDÁ-Carreño, apuntó Artime, ""entendemos que ye un gran error poner los intereses del partíu penriba de los intereses de la vecindá de Carreño, que son los que col so votu escueyen conceyales"". Amás afirmó que ""entendemos qu'estos partíos (PSOE, PP ya IU) amuesen la so incapacidá pa defender a la xente de Carreño, yá que con esta aición espeyen la so dependencia y servilismu a los sos partíos, tornando a defraudanos como responsables municipales"".

El candidatu d'UNIDÁ recordó que ""en Morata de Tajuña, Madrid, los conceyales del PSOE, PP ya IU lleven pesllaos nel so Ayuntamientu dende'l día 22 d'esti mes pa desixir la retirada del proyeutu de central térmica que cuenten llevantar nel so términu municipal, comprometiéndose conxuntamente a nun abandonar fasta tener el compromisu per escrito de los tres partíos estatales"".

Como xustificación a la moción Santiago Artime comentó que ""nun tamos d'alcuerdu con esti modelu que sufrimos n'Asturies, un modelu económicu que xenera mui poca riqueza y mui pocos puestos de trabayu, y namás que dexa contaminación, altos índices de mortalidá, d'enfermedaes, d'impactu nel paisaxe y esbarrumbe del texíu económicu tradicional cuando Asturies ye, amás, ún de los territorios cola atmósfera más contaminada"".

Pa finar Artime anunció que ""dende UNIDÁ-Andecha Carreño vamos siguir trabayando pa evitar que'l proyeutu de la Regasificadora salga alantre, poniendo en peligru la seguridá y la salú de la xente de Carreño y d'Asturies."