Los científicos estraen l’ADN de los güesos de El Sidrón

La cueva del Sidrón nun para d'apurrir afayos interesantes que tan ayudando enforma a los investigadores a determinar les condiciones de vida de los neandertales na parte última de la so evolución nun tiempu en que yá taben sobre la tierra los primeros homo sapiens. Sobre los restos de 43.000 años de antigüedá los investigadores que dirixe'l paleobiólogu del Conseyu Superior d'Investigaciones Científiques (CSIC) Antonio Rosas tan acabante de dar un pasu alantre decisivu al conseguir estraer la secuencia del ADN de los fósiles de la cueva.

Ello ye qu'hasta agora namás se consiguiere estraer ADN mitrocondrial en seis yacimientos en tol mundu y qu'amás ye la primer vegada qu'sti complicáu procedimientu se llogra nun llaboratoriu fuera d'Alemaña o d'Inglaterra, permitiendo amás la estracción del ADN del Sidrón saber que les poblaciones de Neandertales d'Europa entero, dende la Península Ibérica hasta'l Cáucasu yeren xenéticamente mui asemeyaes. Esta conclusión, en contra de lo que suponíen delles hipótesis, permite asitiar pa la especie neandertal un aniciu común que se pon agora na raya del cuartu de millón d'años d'antigüedá, mientres que pa Rosas, los restos de El Sidrón preben que, anque convivieron, nun hebo cruce ente neandertales y sapiens, siguiendo cada especie'l so camín per separao.

Los fósiles del Sidrón que tan agora mesmo esudiándose nel Muséu Nacional de Ciencies Naturales suponen una de les colecciones de neandertales más importantes del continente, con más de 850 pieces de güesu y cinco indivíduos completos, dándose la circunstancia de qu'ente ellos hai, amás d'un neñu de 6-7 años y dos exemplares adultos, otros dos son adolescentes, con una edá d'ente 11-13 años. Ello tien un interés enorme en cuantes que l'adolescencia y los sos cambeos físicos son una ventaya evolutiva que nun se sabe hasta que puntu taba desarrollada nel neanderthal.

El proyectu d'escavación y investigación de los neandertales de El Sidrón supón una inversión de más de mediu millón d'euros que tien un importante patrociniu de la Conseyería de Cultura del Principáu d'Asturies, siendo la Universidá de Barcelona la encargada del proyectu pioneru d'estracción, secuenciación y análisis del ADN. La Universidá d'Uviéu pela so parte, coordina'l proyectu al traviés de la persona del caderalgu Javier Fortea, mientres que'l profesor Marco de la Rasilla ye'l codirector de la escavación na cueva de El Sidrón.