El meyor añu pa Telecable

La operadora asturiana de cable de freba óptico presentó nel añu 2004 un beneficiu netu de 331.157 euros y un resultáu brutu d'esplotación de 20,7 millones d'euros, un 47,7 por cientu más que nel añu 2003.

Telecable, que nel añu 2004 entovía nun espardiere la cobertura de los sos servicios a les cuenques, acabó l'añu con 80.000 llínies telefóniques propies, un 23,6 por cientu más que nel 2.003, mientres que'l númberu d'abonaos al paquete de canales de TV qu'ufierta la empresa foi de 80.000, un 16 por cientu más.

Sicasí, onde meyor añu fizo la empresa asturiana foi nel tema de les conexones a internet, llegando a les 50.000 conexines de banda ancho, lo que significa un crecimientu del 29 por cientu respective al 2003.

El conxuntu de la inversión fecha por Telecable dende la so creación en 1997 ye yá de 168,7 millones d'euros. Cola entrada efectiva del serviciu del cable nes cuenques mineres -el cable llegó a primeros d'esti 2005 a dellos barrios de Mieres y Llangréu- Telecable pue rexistrar un añu históricu no tocante al númberu de clientes, y dende'l departamentu comercial de la empresa apunten la bona marcha de los abonos nes dos villes de les cuenques mineres, onde les oficines de Telecable tan estragaes a solicitúes d'alta. Siero, el conceyu del área central más grande que queda pel momentu ensin serviciu -namás hai pel momentu en Llugones- pasa a ser agora la siguiente asignatura pendiente de Telecable.