El Farho Xixón Baloncestu pilancó col Santa Pola y enguedeya'l so futuru

"El Farho Xixón Baloncestu salió derrotáu del campu del Santa Pola, ún de los colistes de la categoría, pol resultáu de 75 a 64. L'equipu asturianu namás que tuvo nel partíu nel primer cuartu, nel que llegó a tener una ventaya de 5 a 13, dempués los xixoneses pilancaron y foron tres los alicantinos el restu l'alcuentru. Esti ye'l segundu partíu siguíu que pierde'l Farho Xixón Baloncestu -el sestu de la temporada- y les coses tán enguedeyándose p'algamar esi primer puestu na clasificación final que da drechu al ascensu directu. Les coses entá podíen tar peor, pero la derrota del Illescas dexa segundos a los xixoneses, anque empataos a victories col Almería, l'Illescas y el Vic. El primer clasificáu ye l'Axarquía, que lleva ocho victories siguíes.

Si nel partíu escontra'l Tarragona'l tiru esterior xixonés foi una llaceria, nel alcuentru col Santa Pola tovía foi peor, namás metieron un triple de les quince veces que lo intentaron -un siete por cientu d'aciertu-. Los asturianos nun vienen xugando vien en tola temporada, pero nos últimos partíos la situación ye perpreocupante y peligrosa, pues ye necesariu un cambéu pa nun afondar nesi camín. Del desastre xeneral del equipu xixonés hai que salvar a Matt Kiefer, que fizo un partíu perbonu, metiendo ventinueve puntos, garrando siete rebotes y con una valoración de trenta puntos. Col Farho Xixón estrenóse Curtis Bobb, que ta por Peter Rajniak -operáu d'apendicitis y que va tar de baxa mes y mediu- y que nun tuvo un bon entamu.

El trunfu alicantín sofitóse nel bon trabayu de trés de los sos xugadores, Mark Bigelow -nel equipu xixonés la temporada pasada-, David Moro y Butler. El prósimu rival, el sábadu en La Guía, ve ser Caja Rioja, una partíu que va ser perimportante pa nun descolgase de los primeros puestos.

Ficha técnica: Costa Urbana Playas de Santa Pola: Mark Bigelow (16), Samuel Garrido (4), Reginald Butler (11), Matías Ibarra (8) y Javier Sánchez Bernat (9). Tamién xugaron: Asier Martínez, Romá Bas, Alberto Ausina, David Moro (25) y Antonio Cardador (2). Farho xixón Baloncestu: Rubén Suárez, Logi Gunnarson (3), Adrián García (10), Brandon Wofram (12) y Matt Kiefer (29). Tamién xugaron: Chus Pineda (5), José María Balmón, David Jandl (2), Sony Vázquez (3) y Curtis Boob.

Árbitrios: Alberto Sánchez Ardid y José Vázquez García.

Nengún de los dos equipos tuvo xugadores eliminaos por cicnco faltes personales.

Partíu de la ventésima segunda xornada de la Lliga Adecco LEB Plata, xugáu nel Santa Pola-Pabellón Els Xiperets.
Parciales per cuartos: 21-23, 19-13, 12-13 y 23-15."