Sobreseides les denuncies a los militantes de la Xunta en Cuadonga

El pasáu 8 de setiembre, con motivu de la celebración del Día d'Asturies, un garapiellu de miembros y simpatizantes de la Xunta Pola Defensa de la Llingua ficieren una protesta na esplanada de la Basílica de Cuadonga, onde, como ye tradición, taba'l Presidente asturianu Vicente Álvarez Areces. Al pasu d'Areces camín de la ilesia, el grupu de militantes de la Xunta, encabezáu pola característica pita de la xunta, entamó a dar voces de "oficialidá" y protestar contra la situación de la llingua asturiana. La protesta nun pasó de l'altura onde taba'l retén de la Guardia Civil encargáu de la seguridá del acontecimientu, procediendo los axentes a identificar a tolos participantes na concentración.

En pasando un mes dempués d'aquello, los ocho militantes de la Xunta recibieron nos sos domicilios unes cartes certificaes nes que se-yos comunicaba la incoación d'un espediente sancionador por infracción alministrativa. Los fechos constitutivos de delitu, según la Guardia Civil de Cangues d'Onís yeren los de "dar voces contra la comitiva del Gobiernu Rexonal, a la qu'abordaron en grupu portando pancartes contra la so xestión". Pa delegación de gobiernu ello ye constitutivo de delitu en cuantes que va contra l'artículu 26i de la Llei de Seguridá ciudadana (la famosa "Llei Corcuera") que diz que ye "infracción lleve alteriar la seguridá colectivo o armar desórdenes en víes, sitios y establecimientos públicos".

La multa que se-yos pidía podía llegar hasta los 300,50 euros, pero la cosa ta acabante de quedar pa prau dempués de que Dcelegación del Gobiernu entamare ayeri a manda-yos cartes a los acusaos nes que se-yos comunica'l sobreseimientu de la denuncia. Según la carta de Delegación, l'archivu de la causa vien a cuenta de que'l delitu del que s'acusaba a los militantes de la Xunta nun ta consideráu como alteración del orde públicu y polo tanto nun ta tipificáu como delitu.

Los militantes acusaos tan recibiendo la noticia cola lóxica alegría, y dende los servicios xurídicos de la organización apunten que l'archivu de la denuncia vien a demostrar "el pocu rigor col que s'abrió l'espediente" y alégrense de que'l casu pieslle asina porque en casu d'aceptase la denuncia ello supondría "un grave ataque a la llibertá d'espresión"