El drama de Darfur tamién afeuta a la educación

"La metá de los neños del territoriu sudanés de Darfur siguen ensin escolarizar pesie a los esfuercios que tán faciendo delles ONG pa llevar la educación a los campos de refuxaos y a les ciudaes qu'inda siguen en pie na zona; una cifra que supón un total de 650.000 menores n'edá escolar que, por falta de material y fondos, según del grupu ""Save de Children"", tán a la espera del final de conflictu pa entamar col procesu d'escolarización.

""La educación ye'l pegoyu más importante p'afitar una sociedá pacífica y económicamente posible, pero la comunidá internacional siempre pon torgues a la hora de financiar escueles y proyeutos d'escolarización en tiempos de conflictu"" dixo'l presidente de la organización, Charles McCormack.

""Nun podemos permitinos esperar a que pare la violencia pa entamar colos programes educativos, ¿qué pasa colos neños que yá tán n'edá escolar? ¿vamos dexalos tapecíos nel camín de la historia?"", llamentó, en declaraciones pa l'axencia d'información de Naciones Uníes, IRIN.

La guerra, qu'entamó nel 2003 cuando les milicies de Darfur protestaben escontra lo que-yos abultaba una marxinación per parte del gobiernu sudanés, vien sumando yá más d'un millón de neños y neñes desplazaos y persiguíos poles milicies gubernamentales, Janjawed, responsables de bayura d'actos de violencia escontra la población civil."