IU-BA-LV pide la retirada de los símbolos franquistes de les escueles

"Izquierda Unida-Bloque por Asturies-Los Verdes desixó-y a la Conseyería d'Educación del Gobiernu asturianu la retirada de la simboloxía y nomes franquistes d'aquellos centros d'enseñanza nos que tovía existen estos elementos. La coalición mete esta demanda nuna proposición non de llei, presentada énte la Xunta Xeneral del Principáu hai dos díes, na que se solicita'l ""cumplimientu real"" de la Llei de la Memoria Histórica, porque según la formación, ""el Principáu ta incumpliéndola"".

El diputáu de la formación, Jesús Iglesias, recordó que tovía existen dellos centros d'enseñanza que ""caltienen nomes y símbolos que glorifiquen la dictadura franquista, onde se tenta tresmitir, teoricamente, los valores democráticos"". Señaló como exemplos los colexos uvieínos de la Gesta 1 y la Gesta 2, l'institutu Juan Antonio Suances (ex ministru d'Industria demientres la dictadura de Franco), el colexu públicu de Caravia, que según recordó Iglesias, tien el nome del xefe del Altu Estáu Mayor del Exércitu Nacional del Norte na Guerrra Civil, Juan Vigón, o l'institutu uvieín Alfonso II, que ""tien a la so entrada un escudu col xugu y les fleches"".

El diputáu d'IX pidió-y a la Conseyería d'Educación que ""tome les midíes oportunes pa correxir esta anomalía democrática, esti caltenimientu en centros d'educación de nomes y símbolos del réxime franquista""."