El Sporting pasó penriba del Murcia

El Murcia nun llegaba a El Molinón con traza de favoritu. Acabante baxar de primera, la directiva del Murcia ficiere un equipu pa tornar a la máxima categoría, pero los resultaos y el xuegu del equipu murcianu nun tan acompañando. Ayeri l'equipu qu'entrena Mario Husillos foi un rival fácil pa un Sporting que sigue llambiendo mancadures y recuperando xugadores que taben en retiru forzosu por lesión. Asina foi que'lpúblicu de EL Molinón pudo ver otra vegada dempués de meses xugar de titular a Calandria, el fichaxe estrella pa esta lliga na que solo lleva xugaos 5 partíos. A ello ha amestase la recuperación de Dani Borreguero, que llevaba unes selmanes rindiendo perbaxo de lo normal nelli y de Dorado, que sacó un partíu bien curiosu.

El partíu entamó col Sporting acorripiando al Murcia y buscando ocasiones de gol, pero estes nun habíen llegar hasta en pasando'l cuartu d'hora, anque taba yá claro que'l xuegu del Sporting afuracaba la defensa murciana con muncha facilidá. Gerardo remató mal un pase de Dorado, pero a la siguiente Pablo Lago, poco precisu a lo llargo de la tarde, batió perbaxo al arrebatedor del Murcia a pase d'Ismael. L'equipu visitante entós desnortió dafechu, anque tamién lo fizo una parte de la grada del Molinón. Ello foi que cuando Ismael llevaba una xugada d'ataque con traza de llegar a bon términu, dende'l fondu sur echóse una pelota al prau, torgando automáticamente la xugada. Entovía duraba l'enfadu del públicu colos siguidores del fondu sur cuando Calandria protagonizó otra xugada d'ataque entrando per un llateral del área y driblando a ún de los defenses del Murcia. La entrada del arxentinu nun llevaba peligru, en cuantes que'l xugador del Sporting nun tenía descuellu pa tirar y nun había nadie pa garrá-y el pase, pero'l defensa del Murcia tiró al suelu al delanteru del Sporting nun penalti claru que convertió Ismael, que lleva con esti 10 goles esta temporada.

El restu del partíu tuvo poco que contar. El Sporting perdió los papeles al entamu de la segunda parte, pero la entrada de Bauzá aposentó al equipu, mientres que la d'Omar revolucionó una delantera que taba apigazando. El rapaz mandó un bon disparu al poste na meyor ocasión del equipu nel segundu tiempu