Otra selmana ensin plan de normalización

El Plan de Normalización Llingüística del Principáu pasó'l mes de xineru ensin aprobase y febreru tien pinta de llevar la mesma traza. El conseyu de Gobiernu d'esta mañana, primeru d'esti mes acabó ensin l'aprobación del documentu, del que tampoco nun se faló nes deliberaciones qu'acompañen cada sesión del órganu executivu.

Esti nuevu retrasu n'aprobación del plan vien amás a producise nuna selmana en que munches persones dientro y fuera del mundu asturianista contaben con qu'el plan yá diba pasar per conseyu, yá fuere pa la so aprobación definitiva o a lo menos como materia de debate, dempués de dos selmanes qu'alteriaron el normal funcionamientu del conseyu, como'l viaxe a Llusemburgu del presidente Areces y el desplazamientu a Brasil del Conseyeru de Xusticia Javier Valledor. Según pudo saber Asturies.com, la redacción definitiva del Plan ta sometiéndose a un intensu discutiniu, en cuantes que la opción política mayoritaria na Xunta Xeneral del Principáu nun concueya colos conteníos que se proponen nel documentu orixinal, que tien yá una antigüedá de cerca d'un añu. Pela so parte, el director de política llingüística Ramón d'Andrés comentó a Asturies.com que nun quier facer declaraciones sobre'l tema hasta que'l plan nun tea aprobáu