Auschwitz sesenta años dempués

Celébrase güei l'alcordanza de los sesenta años de la lliberación del campu d'esterminiu nazi d'Auschwitz. Mauthausen, onde morrieron 101 asturianos, tien el so cabudañu pal 8 de mayu, una fecha na que pue que nun haya representación asturiana pa conmemoralo, porque Angelina Andrada, la representante asturiana de "Amical Mauthausen" nun dispón de medios pal viaxe. Asturies.com faló con ella nuna fecha tan señalada.

Auschwitz-Birkenau, anguaño Muséu Estatal de Polonia, foi l'escenariu más famosu de la matanza nazi sobre'l pueblu xudíu . Va güei sesenta años la tropa soviética lliberaba esti campu de concentración asitiáu xunta'l pueblu polacu d'Oswieçim descubriéndo-y a la humanidá l'alcance de la traxedia, qu'entovía repercute na memoria de la humanidá. Políticos de más de trenta países xunta supervivientes del campu como la ministra de salú francesa Simone Veil aconceyaron güei n'Auschwitz n'alcordanza de los fechos.

El d'Auschwitz foi un campu que s'abrió nel 1940 como centru de concentración pa presos del nazismu de toles condiciones y que nel 1942 convertióse nun campu d'esterminiu de xudíos. A diferencia d'otros campos como Mauthausen, onde se sometía a los presos a un réxime de trabayos forzaos hasta la so muerte, n'Auschwitz munchos de los presos diben directamente según llegaben pa les cámares de gas. En cinco años pasaron per Auschwitz un millón de xudíos, 150.000 polacos, 23.000 xitanos, 15.000 soviéticos y más 10.000 prisioneros d'otres nacionalidaes, arriendes de minoríes persiguíes como'l casu de los homosexuales. .

Hasta onde lleguen les investigaciones actuales, Auschwitz nun tuvo prisioneros de la república española, pero otru campu de triste alcordanza, el de Mauthausen, foi cárcele y tumba pa más de 7.000 deportaos españoles, bien d'ellos asturianos, en concreto 101 que se tengan documentaos. L'avanzada edá de los supervivientes fai qu'esti pueda ser ún de los últimos cabudaños de Mauthausen nos que los antiguos presos tean presentes. En faltando ellos, los campos de concentración van dexar de ser alcordanza pa ser historia, y, polo que toca a Asturies, yá nun queden supervivientes asturianos del campu de Mauthausen dempués de la desapaición de Galo Ramos, Manuel Cortés y Avelino Fernández, los trés últimos que quedaben.

Con too y con ello, la memoria de Mauthausen caltiénse n'Asturies al traviés d'Angelita Andrada, representante n'Asturies de l'asociación "Amical Mauthausen" y que perdió al so padre naquel campu de concentración. El padre d'Angelita, repúblicanu esiliáu en Francia, morrió na cámara de gas cuando los nazis viero que yá nun valía pa trabayar dempués de meses de trabayos forzaos en Mauthausen, un fechu dramáticu que-y condicionó la vida. El 8 de mayu celébrase'l cabudañu de Mauthausen, un acontecimientu nel qu'Angelita lleva años siendo la única representante asturiana, anque'l coste del desplazamientu (850 euros) pue dexala esti añu ensin acudir a la cita, qu'incluye cuatro díes d'actividaes. Angelita Andrada esplicó a Asturies.com que quier "tener una entrevista con representantes políticos asturianos" citando al delegáu del gobiernu, a oxetu de solicitar una ayuda pa facer esti desplazamientu y llamentó la "poca repercusión que tien la memoria de les víctimes de los campos de concentración na sociedá asturiana y nos sos representantes políticos". Según esplicó Angelita, "otres comunidaes como la catalana lleven una gran representación institucional y de familiares y veteranos, con una bandera de Cataluña enorme mientres qu'equí yo voi sola con la nuestra bandera y da igual lo muncho que salgamos nos periódicos porque nun nos faen casu"