La Xunta Pola Defensa de la Llingua entrega los Premios Andrés Solar esti vienres en Xixón

Los premios "Andrés Solar" que caltienen viva dende va 18 años l'alcordanza del escritor de Deva estrémense tolos años en dos galardones, el positivu o Pegollu 2004 a la entidá o persona que más ficiere al favor del asturianu y qu'esti añu va pa la emisora uvieina Radio Sele, mientres que'l "madreñazu" o premiu negativu va a la persona de José Luis Iglesias Riopedre, Conseyeru d'Educación del Principáu d'Asturies. Ye tradicional que'l receptor del madreñazu nun acuda a recibilu, anque esta norma non escrita valtáronla en dos ocasiones el diputáu popular Isidro Fernández Rozada y el conceyal socialista en Xixón Faustino Venturo.

Pa esti añu la Xunta cuenta con convertir los premios en daqué especial y asina cuéntase coles actuaciones musicales de Xulio Ramos y de Nuberu. El grupu de Chus Pedro y Manolo va repasar dellos de los sos temes más conocíos en formatu acústicu, mientres que Xulio Ramos va cantar dellos poemes musicaos d'Andrés Solar acompañáu a la guitarra por Óscar Robledo, músicu que formó parte de munches formaciones nos años del "nuevu canciu astur" y qu'agora vuelve a la escena dempués d'un tiempu separtáu d'ella.

L'actu complétase cola proyección del documental "Andrés Solar, una voz del surdimientu" realizáu por Pelayo Duarte y Javier Lueje y nel que se reconstruye la vida d'Andrés Solar al traviés del testimoniu de les persones más allegaes al autor de Deva.