Los datos del Eurostat echen a Asturies del "oxetivu 1"

Namás cuatro Comunidaes Autónomes españoles (Andalucía, Castiella-La Mancha, Extremadura y Galicia) presentaron nel trieniu 2000-2002 un PIB por habitante perbaxo del 75% de la media de la UE, que da accesu a les ayudes europees a les que tienen derechu les rexones "oxetivu 1"según datos del Eurostat.

Nesti trieniu Extremadura presentó un Productu Interior Brutu por habitante que foi el 60,1% de la media de la Unión Europea; Andalucía, el 69,2%; Castiella-La Mancha, el 74,1%; y Galicia el 74,9%. Asturies queda penriba d'esi 75% qu'acuta la llende pa ser o non oxetivu prioritariu de la UE. Ello ye grave enforma en cuantes que va ser precisamente la media del trieniu 2002-2004 la qu'emplegue la UE a hora de repartir les ayudes pal periodu 2007-2013. Castiella-La Mancha y Galicia, con marcar perbaxo del 75% nel cómputu del trieniu podríen quedar tamién fuera, en cuantes que presenten una llinia ascendente a lo llargo del trieniu, marcando nel últimu añu PIBs que perpasaron el 75% comunitariu (Galicia 76,6%) Castiella-La Mancha 75,2%).

Sacantes estes cuatro, toles autonomíes que yeren hasta agora oxetivu 1 de la UE nel estáu español pasen con bastante del 75% que da derechu a los fondos de cohexón, resultando espectacular el casu de la Comunidá Valenciana, que pasó de la crisis a tener el 88,9% de la renta europea. Les islles Canaries tienen el 87,6% y Castiella y Llión tien el 86,7%, mientres qu'Asturies col 78,9% y Murcia col 77% de la renta media de la UE queden nun grupu que va entrar a una categoría especial de transición que va llamase "1 bis".

A esti grupu "1 bis" entren tamién entren toles comunidaes autónomes que queden fuera del oxetivu 1 por culpa del efectu estadísticu que supón la entrada a la UE d'estaos como'l polacu, que tien índices de PIB que nun lleguen al 36% de la media comunitaria. Xunta Asturies, van ser "1 bis" n'España Galicia, Castiella-La Mancha, Murcia y les dos ciudaes autónomes de Ceuta y Melilla). El "1 bis" supón recibir ente'l 2007 y el 2013 un 66% de les ayudes que se veníen recibiendo hasta agora.