Teatru Kumen estrena "Actu imprevistu" en L'Entregu

"Teatru Kumen abre la I Muestra de Teatru Aficionáu de Samartín del Rei Aurelio cola representación de la obra ""Actu Imprevistu"" adautación al asturianu del orixinal ""Acto Imprevisto"" del autor malagueñu Miguel Gallego. La representación tendrá llugar nel Teatru L'Entregu a les 20:00 hores d'esti sábadu 1 de marzu. Dempués d'actuar en L'Entregu, Kumen volverá a poner ""Actu Imprevistu"" tamién en Posada Llanera (5 de marzu), Colunga (7 de marzu) y Sotu'l Barcu (8 de marzu).

""Actu Imprevistu"" valse de la naturalidá, inocencia y sinceridá de dos llimpiadores pa llanzar una denuncia social acerca de la realidá cotidiana de munches muyeres a les que circunstancies vitales, problemátiques y conflictos les lleven a pervivir en condiciones sociales penoses. Les dos muyeres ponen sobre l'escenariu les sos frustraciones personales dende l'humor, faciendo ensin querer una representación teatral y poniendo sobre les tables les aspiraciones de los trabayadores y de les muyeres en xeneral. Dos personaxes traxicómicos que, por un casual, permítense'l luxu de suañar nun actu pasaxeru ya imprevistu.

Esti montaxe pretende averanos a la realidá cotidiana, comprometenos con esa realidá social que nos arrodia por... ""humor al arte"". Nel escenariu van xuntase dos realidaes mui estremaes: d'un llau la lloca actividá que precede a una representación teatral: montaxe de les lluces, el soníu, los decoraos..., too ello tiñío d'unos llinguaxes y rituales propios, que de sópitu s'interrumpe énte l'apaición de les trabayadores de la llimpieza, ayenes a too ello, y sorprendíes ante cada nuevu descubrimientu. Será, la intervención d'un tercer personaxe, lo que posibilitará que la maxa'l teatru raspie, per un instante, la triste vida de les dos muyeres.

Tamos énte una comedia con posu amargu, que llogra trescender los tópicos gracies a un argumentu bien preparáu, que nos avera a una realidá cercana con un llinguaxe atrayente nel que reinen l'humor y la tenrura.

La I Muestra de Teatru Aficionáu va celebrase en marzu nel Teatru de L'Entregu cola participación de cuatro grupos teatrales de la cuenca'l Nalón. Amás de Kumen, cola obra 'Actu Imprevistu' pal sábadu día 1 de marzu, tamién actuarán el grupu Padre Coll, cola obra 'Toi permala' el sábadu 8, el grupu El Refaxu cola obra 'El gallu la quintana', el 15 de marzu y yá, pa rematar, el sábadu día 22 actuará La Fumarea cola obra 'El mélicu a palos'."