Aznar diz en Grau que "Zapatero tien duldes de qu'España seya una nación"

"L'ex presidente del Gobiernu y presidente de la Fundación pal Análisis y los Estudios Sociales (FAES), José María Aznar, dixo na tarde del xueves que'l presidente del gobiernu y candidatu a la reelección pol PSOE, José Luis Rodríguez Zapatero, ""tien duldes de qu'España seya una nación"". Asina, sorrayó que ""España ye la nación más antigua d'Europa y tien de siguir siéndolo"". Al empar declaró que ""pueo entender qu'esista xente separatista, pero lo que nun entiendo ye que'l Gobiernu del mio país pacte colos independentistes"", apuntó en referencia al Gobiernu de Zapatero ""nun se pue gobernar España pactando colos que quieren cargásela"".

Aznar fizo estes declaraciones nel mitin que los afiliaos y simpatizantes del PP celebraron en Grau, nel que tamién participaron el cabeza de llista del PP por Asturies y alcalde d'Uviéu, Gabino de Lorenzo, el presidente del PP d'Asturies, Ovidio Sánchez y l'alcalde de Grau, Antonio Rey.

Aznar apuntó asina mesmo que'l presidente del Gobiernu ""sigue negociando con ETA"", esplicando que ye esta la razón pola que Zapatero ""nunca diz que nun va negociar de nenguna de les maneres"". De fechu, dende'l puntu de vista del ex presidente, Zapatero ""va siguir negociando"" colos terroristes si ta otra vuelta nel gobiernu.

Como amuesa d'agradecimientu a la convidada d'asistir al actu, el presidente de la FAES dixo tar mui ""contentu"" entamando la campaña n'Asturies, tierra na que tien ""mui bonos amigos"". Amás, señaló qu'esti sentimientu va tamién a la so familia y al fechu de que-y punxera al nietu Pelayo."