Chechu Rubiera firma pola oficialidá

Deportistes como Chechu Rubiera, Manolo Busto o la montañera Rosa Fernández firmaron el manifiestu del Conceyu Abiertu pola Oficialidá, que calez máquines pa una manifestación el 5 de marzu.

El Conceyu Abiertu pola Oficialidá, la plataforma entamada pola Xunta Pola Defensa de la Llingua y abierta a organizaciones polítiques, sociales, culturales y de toa triba col únicu puntu de consensu d'algamar la oficialidá del asturianu na próxima reforma estatutaria, ta caleciendo máquines pa una campaña reivindicativa a lo llargo de los prósimos meses y na que rescampla la convocatoria d'una gran manifestación que va tener llugar el prósimu día 5 de marzu, anque entovía ta por concretar el llugar y la hora .



D'otra manera, representantes del Conceyu Abiertu pola Oficialidá falaron con Asturies.com y comentaron delles novedaes que tan produciéndose alredor de la plataforma. Ello ye qu'el CAO ta pasando'l so manifiestu ente los deportistes asturianos y bien d'ellos tan respondiendo positivamente al llamáu de la plataforma, que cuenta yá col sofitu de xente como los ciclistes del equipu US Postal Chechu Rubiera y Benjamín Noval, el campeón del mundu de piragüismu Manuel Busto o el capitán del equipu de fútbol del Real Uviéu, Paul Folgueras. La montañera Rosa Fernández, primer asturiana en llegar al cume d'un ochomil y que yá tien nel macutu los cumales del Gasherbrum II (8.035 mts.) y del Shisha Pangma (8.046 mts) tamién punxo la so firma pola oficialidá del asturianu firmando'l manifiestu del CAO