Apple concentra l'ordenador personal nuna caxa

Apple, la casa que dende 1978 vien revolucionando'l mundu de la informática colos sos desarrollos, ta acabante de dar otru reblagu técnicu cola presentación del " mac mini" que la firma americana ta acabante d'enseñar al públicu na feria Mac World Expo.

La casa de la mazana pretende con esti llanzamientu arrampuñar con parte del mercáu de PC's y l'agresiva propaganda qu'acompaña'l productu fala de "guardar el PC nel armariu". Ello ye que por un preciu alredor de los 500 euros, el Mini Mac ufierta na so configuración más básica, un discu duru de 40xb, un procesador de 1,25 xhz y grabadora de CDs, ello con un tamañu record. La unidá central del Mini Mac ye una caxa cuadrada de 16,5 centímetros de llau y que namás mide d'alto 5 centímetros, pesando 1,4 kilos. El preciu nun incluye tecláu, monitor nin ratón, pero la caxa d'Apple vien preparada p'adaptase a cualquier monitor de PC y a cualquier tecláu o ratón que vengan con conexón USB.

Los distribuidores asturianos d'Apple van tener les primeres unidaes d'esti nuevu ordenador pa les primeres selmanes de febreru, anque yá ye posible acutar el pidíu coles especificaciones que se precisen en cada casu.