Un encierru que val una entrevista

Un grupu de cuatro representantes de l'Asociación de Families Pola Escolarización n'Asturianu protagonizaron esta mañana un encierru nes dependencies de la Conseyería d'Asuntos Esteriores y Xusticia, tratando asina de forzar una reunión col conseyeru Javier Valledor, al que dicen que yá-y unviaren dos cartes ensin rempuesta pidiéndo-y una entrevista pa tratar de la situación del asturianu na enseñanza y ver que midíes pue tomar el departamentu de Xusticia nun asuntu que cinca directamente al cumplimientu de la llei. Dempués de dos hores zarraos nes oficines del Gobiernu, y col sofitu d'otru grupu de miembros de l'asociación y simpatizantes a la puerta del edificiu de la Conseyería, los representantes de l'asociación consiguieron que los técnicos de la Conseyería-yos dieren cita con Valledor, actualmente ausente por descansu, pal llunes qu'entra a les 9,30 de la mañana. Anque los manifestantes consiguieron lo que pidíen, ún de los representantes de l'Asociación manifestó a Asturies.com que "ye triste tener que recurrir a esto pa que nos reciban"

L'asociación de Families Pola Escolarización n'Asturianu creóse nel branu del añu 2004 de la iniciativa d'Arturu Xosé Bermeyu y Dulce Mª Xil, padres de Catuxa Bermeyu, que quixeron matricular a la so fía n'asturianu pero vieron como'l centru la empobinaba pa clas de francés en cuantes que la llei nun obliga a facer grupu d'asturianu nun habiendo un mínimu d'ocho alumnos que lo pidiere. Otru de los miembros de l'asociación ye l'empresariu José Suárez Arias-Cachero, que tien un fíu n'Educación Infantil y pal que pidió l'asignatura d'asturianu, pero l'Alministración educativa sigue ñegándo-y esi derechu. Llucía Menéndez, otra de les socies, tien un fíu nun Institutu onde sí hai asignatura d'asturianu, pero tien otru pequeñu pa entamar Educación Infantil que nun va poder recibir asturianu .

L'asociación califica estes situaciones de "conculcación de los drechos llingüísticos nel sistema Educativu" y entienden que la Conseyería d'Educación incumple la llexislación vixente en materia de derechos llingüísticos d'ámbitu internacional, estatal y asturianu. Énte esta situación, l'asociación pide que se reconoza la oficialidá del asturianu y qu'esta s'acompañe d'una llei d'escolarización de la llingua. Na opinión de l'Asociación, l'actual gobiernu de PSOE y IX incumple la llei d'usu y el mesmu pautu de gobiernu al torgar el derechu a recibir clase d'asturianu nuna o en toles etapes educatives del sistema.