“Oficialidᔠva defender a los estudiantes del IES Alfonso II

Meses dempués de la fuelga d'enseñanza que paró los institutos asturianos, organizaciones de defensa de los derechos llingüísticos denuncien que la situación de la escolarización del asturianu ta lloñe de normalizase. Ye'l casu de la plataforma "Oficialidá" que ta en contactu con un grupu d'alumnos del IES "Alfonso II" d'Uviéu pa llevar alantre la so reivindicación del derechu a poder recibir clas d'asturianu.

Según esplicó a Asturies.com José Suárez Arias-Cachero, representante de l'asociación "Oficialidá" qu'ofrez asistencia llegal de baldre a toles persones afectaes por casos de discriminación llingüística, los alumnos del 'IES "Alfonso II" asitiáu nel centru d'Uviéu denunciaron énte l'asociación "Oficialidá" que'l so centru d'estudios, precisamente ún de los que sofitaron masivamente la fuelga del pasáu 10 de payares, nun ufiertaba l'asignatura d'asturianu, ello con ser el colectivu d'alumnos que lo pidíen superior al cupu mínimu d'estudiantes que demanda la Conseyería d'Educación. En viendo la situación nel IES, que Arias Cachero calificó de "escuru pautu pa nun dar clas d'asturianu" "Oficialidá" punxose al serviciu de los alumnos pa conseguir la so reivindicación. Como primer pasu, representantes de l'asociación van entrevistase per un llau cola directiva del centru y per otru colos responsables de la Conseyería d'Educación. Casu de nun llegar a un alcuerdu "Oficialidá" nun descarta entamar un procesu llegal