Iñaki Santianes saca'l so primer discu

"Foncalada", editáu pola discográfica "Fonoastur", ye'l discu del gaiteru carbayón Iñaki Santianes.

Esti cd vien a amestase a la nómina de "discos de gaiteros". Como yá ficieron nel so momentu gaiteros como Diego Pangua o Guti, a Iñaki Santianes llego-y el momentu, al traviés d'esti trabayu discográficu, d'amosar la so capacidá técnica y poner enriba de la mesa cual ye'l so estilu a la hora d'interpretar la música tradicional asturiana y les composiciones. Iñaki Santianes ye un vieyu conocíu ente los gaiteros y gaiteres d'Asturies, años como gaiteru solista o acompañando a la banda de gaites "Ciudad de Oviedo", dieron a Iñaki la esperiencia y la seguridá pa ganar nuna ocasión el "Concurso y muestra de folclore ciudad de Oviedo" nel apartáu de pareyes de gaita y tambor, quedar segundu nel Memorial Remis Ovalle, y entamar la so bandina "Cotcoricó"

El discu caltién les caracterísques propies de lo llamábamos enantes "discos de gaiteros". Al Traviés d'una llinia acústica y mui clásica no que toca a les igües, la gaita nun dexa de sonar en nengún cantar, que ye, como ye normal, la protagonista del discu. Anque ye protagonista con actores secundarios, la guitarra y el bodhrám de Borja Vázquez, el vigulín de Leticia Martín y los teclaos y percusiones de Yónatan Sánchez acompañen al Iñaki en casi toes les pieces del cd. Rescampla la collaboración de Yónatan Sánchez, hermanu d'Iñaki, compositor y arreglista de les más des les pieces de "Foncalada".