"Asturies ye la única rexón d'España que pierde población"

"El númberu tres de la candidatura del Partíu Popular por Asturies, Pilar Fernández Pardo, manifestó esti miércoles el ""esmolecimientu"" del so partíu pola perda ""alarmante"" de población que ta teniendo Asturies yá que, según dixo, ""ye la única rexón d'España que pierde población"".

Pardo fizo estes declaraciones en L'Entregu, onde fue a facer campaña xunta'l presidente del PP de Samartín del Rei Aurelio, Joaquín Fernández y la diputada asturiana Elma Alonso.

La candidata del PP sorrayó'l fechu de qu'Asturies tenga ""la pirámide al revés"", amás de tener ""una población avieyada"". Asina, indicó que les previsiones conseñen que ""pa 2017, d'una población d'un millón d'habitantes, n'Asturies namás habrá 100.000 persones de menos de 15 años"". ""Esto esmoleznos sobre manera de cara a les pensiones, que siguen siendo un problema n'Asturies"".

Pilar Fernández Pardo esplicó que lo que busca'l PP ye ""un cambéu pa que n'Asturies se xeneren puestos de trabayu y la población seya más moza"". ""Hai que da-y la vuelta a les polítiques que tán faciéndose""."