Una empresa de subastes na rede acusada d’estafa

El mes pasáu, la policía detuvo a Antonio Garrido, propietariu d´AWS y Subastaspc.com, dos famoses webs de subastes d'ordenadores de segunda mano, acusáu d´estafa na rede. El propietariu d´una de les mayores empreses de distribución d´informática del Estáu Español ta acusáu de nun entregar los equipos que mercaron y pagaron bien de clientes al traviés de delles webs de la empresa. Les denuncies y rumores yá veníen de vieyo, y falábase muncho en foros especializaos de que Subastaspc.com nun entregaba los equipos informáticos mercaos o bien dábalos con perimportantes defectos. Mentantu, la empresa continuaba con una ambiciosa campaña de marketing y d´imaxe, qu'incluyía unvios masivos del tarrecíu spam o corréu basoria pa dase a conocer. Amás de les estafes denunciaes en Subastaspc.com, les denuncies tamién chisquen a otru web propiedá de Garrido, el sitiu MercadoLibre.es. Los internautes siempre creyeron qu'estos dos sitios nun pertenecíen a la mesma persona, en cuantes que Mercadolibre.com tenía gran prestixu internacional. Pero la realidá ye que'l polémicu empresariu mercare por solo 6.000 euros la marca y dominiu MercadoLibre.es, mientres que MercadoLibre.com mercolo eBay, onde la empresa norteamericana n´España ya tenía mercao iBazar y nun-y interesaba'l .es.

Más de 100 denunciantes y afectaos aseguren que pagaron per adelantáu unos ordenadores que nun recibieron. L'empresariu diz qu'esos fallos na entrega foron incidencies técniques, pero en dellos casos el "retrasu" yera de más d'un añu. El casu ye qu´esti taba acabante d´inaugurar una moderna sede en Madrid na que trabayen más de cien persones, y dende´l centru d´atención al cliente nun yeren quien a atender les más de 6.000 peticiones diaries que teníen . Sicasí, dende la empresa reconocieron que nun s'unviaron dellos equipos por culpa de la gran cantidá de pidíos que tienen. Una hestoria más de fracasu na rede por morrer d´ésitu.