Xixón xube los sos niveles de contaminación

"Xixón ye una de les poques ciudaes asturianes onde xubieron los niveles de contaminación del aire'l pasáu añu 2007, rescamplando'l casu de la estación de l'Avenida la Constitución onde xubió un 25 por cientu, según los datos remanaos pola Coordinadora Ecoloxista d'Asturies.

En Partícules en Suspensión (PM10) perpasáronse los niveles de proteición de la salú 248 díes del añu, duplicando asina los datos del añu anterior. Estes partícules tán rellacionaes cola apaición y empeoramientu de bayura de patoloxíes, sobre manera de tipu respiratoriu.

Dende la Coordinadora Ecoloxista conviden al Ayuntamientu de Xixón y al Principáu d'Asturies a ""asumir les sos responsabilidaes y trabayar pa baxar estos niveles de contaminantes"" asina como ""cumplir cola Llei de Calidá del Aire y Proteición de l'Atmósfera aprobada pol Parlamentu'l pasáu mes d'ochobre"". Asina mesmo dende'l grupu ecoloxista recuérdase que proyeutos como los de la incineradora o la regasificadora d'El Musel ""nun faen más qu'aumentar los niveles de contaminación y el riesgu que yá sufren los xixoneses""."