UNIDÁ presenta dos mociones escontra La Regasificadora

"El candidatu d'UNIDÁ al Congresu, Faustino Zapico, xunto col voceru de la coalicion en Xixón, Pablo Rodríguez Alonso, presentaron nel rexistru municipal del Ayuntamientu de Xixón una moción asemeyada a la que'l conceyal d'UNIDÁ en Carreño, Santi Artime, presentara na Comisión de Mediu Ambiente del so Ayuntamientu, escontra'l proyeutu d'instalación d'una planta regasificadora nel puertu d'El Musel.

Según esplicó la coalición, pente medies d'una nota prensa, la moción va aldericase nel plenu municipal del xueves 28 de febreru en Carreño, pidiendo dende UNIDÁ, a los grupos municipales con representación nel Ayuntamientu de Xixón, que faigan lo mesmo nel conceyu nel que cuenta llevantase la planta, si'l movimientu social y ciudadanu "Regasificadora Non" nun torga estes intenciones.

La moción contién una docena d'argumentos contrarios a la instalación, como l'incumplimientu de la distancia de seguridá con noyos urbanos; l'incrementu de los yá altos niveles de contaminación o la non xeneración d'un númberu de puestos de trabayu que xustifiquen la inversión.

Zapico sorrayó'l posicionamientu totalmente contrariu a ""la instalación d'esta Planta regasificadora y a los planes Enerxéticos p'Asturies, dalgo que supón un puntu básicu del nuestru programa electoral"". La coalición recordó amás que la planta regasificadora va traer de la mano la instalación de 8 a 10 nueves centrales de ciclu combináu y de nueves llinies eléctriques."