La biotecnolóxica Antibióticos quier invertir n´Asturies

Antibióticos Biotechnology ye´l posible nome de la sociedá que la casa farmacéutica Antibióticos quier armar nes Cuenques, pa lo que ta negociando estos díes colos responsables del Institutu de Desarrollu del Principáu (IDEPA). La empresa fabricaría los medicamentos xenéricos que tanto tan medrando nel mercáu. L´oxetivu ye entamar a furrular nel 2005 coles ayudes de los fondos mineros y de la Sociedá Rexonal de Promoción (SRP) con una inversión prevista de 30 millones d´euros y la creación inicial de 50 puestos de trabayu mui cualificaos. Les posibilidaes d´inversion son delles: sovenciones con cargu a los fondos mineros, créitu blandu y tamién posibilidá de participación accionarial na nueva empresa por parte del SRP en forma de capital riesgu.



Antibióticos foi la empresa cola que Mario Conde entamó a facer perres rápidamente, atropando con ella perres abondes pa facese col control de Banesto, mientres qu'Antibióticos acabó colos años en manes de la italiana Edison. La sede principal de Antibióticos asítiase en Llión, onde trabayen sobre 400 profesionales, amás de fábriques en Milán y China. A últimos de los noventa la empresa tuvo dellos problemes económicos.



La cuestión ye que la multinacional Edison, propietaria de Antibióticos, nun quier agora tener un holding tan diversificáu. Por ello los italianos tan a la gueta de centrase solo nel sector eléctricu y vender les demáss llinies de negociu. Asina, Antibióticos tien delles duldes sobre´l futuru que tien preparáu el grupu Edison pa ellos, lo que ta dañando a la empresa en Llión, onde hai polémica ente trabayadores y gobiernu llionés. Énte la mala traza que tan tomando les relaiciones col gobiernu de la Xunta de Castiella y Llión, la empresa decidió camudar el sitiu onde asistiar la fábrica nueva, que de mano, diba facese en terrén llionés. De fechu Antibióticos ya tenía comprometíu col gobiernu castellanu llionés la inversión en Llión y ya mercare'l suelu onde ponese.



Contra esto, Asturies prestó-yos más a los italianos pola cercanía a Llión y sobre too poles xeneroses ayudes económiques qu'ufierten el Gobiernu Asturianu y los fondos mineros. Mentantu la Xunta de Castiella y Llión esixe-y a la farmacéutica Antibióticos qu'aparque tolos proyeutos d´inversión enantes de camudar de propietarios, y ello ye porque la idega de la Xunta de Castiella y Llión ye que la farmacéutica llionesa Laboratorios Ovejero compre Antibióticos pa que too quede en casa. Pero esta posibilidá ta lloñe porque Laboratorios Ovejero, venti veces más pequeña qu'Antibióticos, nun tien capacidá pa tala. Sólo una gran operación de Laboratorios Ovejero, Caja España, Caja Duero y dalgún grupu industrial llionés tendría dalguna oportunidá pa tomar el control de la farmacéutica, pero esta última posibilidá vese perdifícil.

N´Asturies el sector farmacéuticu ta representáu por la cooperativa asturiana COFAS, pola empresa tamién asturiana Asturfarma y pola multinacional alemana Bayer, ésta última asistiada en Lada (Llangréu). Otramiente, el sector biotecnolóxicu astur ye prácticamente inesistente. Nesti terrén destaca la investigación biotecnolóxica alrodiu la universidá asturiana pero falla la comercialización. Solo la start up Biozell, con sede nel Parque Tecnolóxicu de Xixón y enfotada nel análisis d´ADN ente otres investigaciones, ye un oasis nel desiertu biotecnolóxicu asturianu.