El Sporting de Xixón volvió a plaza d'ascensu

El Sporting de Xixón volvió esta selmana a puestu d'ascensu dempués d'imponese n'Albacete por 1 gol a 2 contra un equipu en plaza pa baxar a 2ªB y que pasa per una grave crisis. Los futbolistes de Manolo Preciado foron infinitamente superiores al Albacete, rescamplando la figura de Kike Mateo, anque foi Pablo de Lucas el qu'abrió'l marcador nel minutu 18 dempués d'un fallu en cadena de la defensa local, que foi un coladeru.

Nel segundu tiempu, el Sporting supo matar el partíu tarazando los intentos aisllaos de los homes del Albacete más arrechos, casu d'Alustiza, qu'obligó a Roberto a facer una bona parada. El llabor de contención de Gerard foi clave nesti sentíu. Pa evitar mayor peligru, nel 81 Sastre, nuna de les sos xubíes pela banda, punxo un 2-0 de tiru cruzáu que paecía cuasique definitivu. Alustiza igüó un poco la debacle marcando'l 1-2 yá col descuentu acabando, pero nun pudo evitar el trunfu del Sporting nin el despidu pal so entrenador, Quique Hernández. Los de Xixón reciben a gora en casa al líder Numancia, un partíu clave pa ver si son aspirantes serios al ascensu.