Hevia va ser sintonía de la Vuelta

Un tema del últimu discu d'Hevia va ser la melodía oficial de la vuelta a España na edición d'anguaño.

El corte númberu cinco de "Étnico ma non troppo", que lleva'l nome de "Tirador", foi la canción escoyía pola organización de la Vuelta a España pa servir de banda sonora de la prueba ciclista. "Tirador" ye un tema dedicáu pol gaiteru a Toni Tirador, ciclista asturianu de los años cincuenta que vive en Villaviciosa, localidá natal de José Ángel Hevia. Musicalmente la pieza cumple los canones de lo que debe ser un tema que valga pa "canción de la vuelta". Animada y comercial, ta fecha basándose nuna melodía tradicional asturiana mui conocía nel repertoriu de los gaiteros y gaiteres asturianos llamada "Entemediu Xuanín de Mieres".

José Ángel Hevia tamién tuvo esta selmana na presentación en París de la edición d'esti añu del Festival Intercélticu de Lorient, qu'esta vegada va tar dedicáu a Asturies y que va desenvolvese dende'l 1 d'agostu al 10 d'agostu. El gaiteru asturianu va participar nel festival actuando'l tres d'agostu na ciudá bretona.