El númberu d'oses pardes duplicóse nuna década

"El númberu de femes d'osu pardu duplicóse na última década en tol cordal cantábricu, anque en mayor midida na zona occidental que na oriental. Nel casu d'esta última, que comprende Cantabria y Palencia, nos dos últimos años atopáronse tres oses diferentes con esbardos, lo qu'implica que s'afitó la reproduccion, según el presidente de la Fundación Osu Pardu, Guillermo Palomero.

Asina, nel 2006 detectáronse dos oses con dos críes nos montes de Vega de Liébana, Pesaguero y Hermandad de Campo de Suso, y nel 2007 una osa col esbardu nos montes de Pesaguero y Poblaciones. Nesti momentu, esta población oriental cuenta con un censu que ronda los 30 osos.

Pela so parte, la población occidental, allugada ente l'occidente d'Asturies y el Altu Sil lleonés, algama los 100 exemplares, calteniéndose nuna tendencia creciente nos últimos años. Estos datos amuesen, según el presidente de la Fundación Osu Pardu, que se paro'l procesu de regresión nel cordal y cada día ye más normal la presencia d'esti animal na zona oriental, onde ta más amenazáu. Esta bona evolución débese, según dixo, a la meyora del so hábitat y al apoyu social hacia los osos, que son ""mui bien toleraos"" polos vecinos de les zones peles que pasen."