Entama la Feria Internacional de Teatru pa neños y neñes

"Esti domingu 22 de febreru, nel teatru Xovellanos de Xixón, va inagurase la Feria Internacional de Teatru pa neños y neñes (FETEN), qu'esti añu va acoyer bayura de compañíes y xéneros nos cinco díes de programación. La primera d'elles será la madrilana ""Orfeo y Eurídice"" cola obra ""La mar de marionetas"", formando parte del actu inagural qu'entamará a les 18.00 hores.

FETEN, que val d'esposición pa toles compañíes que faen un apueste pol públicu más mozu, cuenta xuntar a más de 500 distribuidores, críticos y responsables de cultura que serán los encargaos d'escoyer les propuestes más afayadices pa la programación de les sos propies actividaes.

Sicasí los neños, verdaderos protagonistes d'esta feria, tamién van poder disfrutar de los espectáculos nes sesiones d'escolares de la mañana, asina como nos montaxes de cai que les compañíes procedentes de países como Bélxica, Arxentina, Xapón o Francia representarán nesti alcuentru qu'entamara a andar nel añu 1991."