Dulcamara, premiu al Meyor Cantar 2008

"El grupu Dulcamara gana'l premiu al Meyor Cantar, na so segunda convocatoria, col tema ""Nosh"". El grupu asturianu, formáu por seis pandereteres, competía con otros cuatro candidatos: ""Poema Inacabáu"" d'Anabel Santiago, ""Negra"" d'Esther Fonseca, ""Na mio barca"" de Skanda y ""Soncai"" interpretáu por Soncai System.

El premiu, con una dotación económica de 1.000€ y una escultura de Maria Xesús Rodríguez, foi entregáu na Casa Cultura Teodoro Cuesta de Mieres, tando formáu'l xuráu por Consuelo Vega, direutora de Promoción Cultural y Política Llingüística, Maria Antonia Pedregal, responsable de la Oficina de Política Llingüística, Marta Barbón, redactora de ""La voz de Asturias"", Penélope Miranda, filóloga y responsable del serviciu de normalización de L.lena, la profesora de música Florentina Cuadriello, Alberto Toyos, direutor de los ""40 Principales"" n'Asturies y Roberto Pato, críticu musical.

L'actu, qu'entamó a les 8.30 hores, consistió na interpretación de los cinco temes finalistes por parte de los grupos y solistes candidatos. D'otru llau, y pa pone-y el ramu a la ceremonia, el grupu Nuberu, qu'hai unos meses anunciara la so retirada, ufrió un conciertu enllenu de temes perconocíos por tolos presentes.

Dulcamara ta formáu poles pandereteres Natalia Nuño, María Gavieiro, Carmen Trevías, Tatiana Fernández, María Vázquez y Paula Cristóbal, amás de los músicos Ramón G. Morán (teclaos), Xurde Fernández (flautes), Tana (batería), Dani Jiménez (baxu) y Rubén Álvarez (guitarres). Anque'l grupu debutara per primer vez nel ""Conciertu pola Oficialidá"" del añu 2005, nun editaron el primer discu ""Salí, l.luna"" hasta'l pasáu mes de Payares, siendo precisamente con esti trabayu col qu'algamen el prestixosu premiu que se-yos concedió na tarde d'ayeri."