Caxastur faise col 5% d'Enagas

La entidá asturiana Caxastur dio parte ayeri a la Comisión Nacional del Mercáu de Valores de que tien el 5% d'Enagás, lo qu'asitia a la caxa asturiana como'l segundu mayor accionista de la compañía de gas.

Caxastur pagó 72 millones d'euros poles participaciones, que foi atropando dende payares del 2.002, cuando tenía'l 1,71% d'Enagás. Con esta inversión sigue enanchándose l'arcu d'empreses en que la caxa asturiana tien participaciones estratéxiques como'l 5% que tien na cadena de tiendes d'aeropuertos Aldeasa y el 0,82% en Rede Eléctrica Española. Aparte d'esto, la principal participación industrial de Caxastur sigue siendo'l 25% que tien n'Hidroeléctrica, empresa que preside'l director de Caxastur Manuel Menéndez.

Les operaciones de Caxastur tomando participaciones en Rede Eléctrica y Gas Natural tienen muncho que ver cola estratexa de desenvolvimientu de la eléctrica asturiana, que saldría beneficiada en casu de trunfar la OPA de Gas Natural, principal accionista d'Enagas, sobre Iberdrola, competidor d'HC.