Abbas descarta, per agora, declarar la independencia

"El presidente palestín, Mahmud Abbas, descartó nel día d'ayer declarar la independencia y prometió siguir negociando con Israel p'algamar un alcuerdu de paz, dempués de qu'ún de los sos ayudantes pidiera una declaración unillateral d'independencia, imitando a Kosovo, si les conversaciones con Israel nun espoxigaren.

""Vamos siguir les negociaciones pa llegar a un alcuerdu de paz a lo llargo'l 2008. Esi alcuerdu tien de tener una solución pa toles cuestiones finales, inda Jerusalem"", señaló Abbas nun comunicáu. ""Sicasí, si nun podemos algamalo, y llegamos a un puntu muertu, tornaremos a la nuestra nación árabe pa tomar toles decisiones necesaries al más altu nivel"", añadió, ensin dar más detalles.

Previamente, Yaser Abe Rabbo, miembru del equipu palestín na negociación y ún de los principales asesores d'Abbas, declarara que los palestinos deberíen considerar la posibilidá de declarar unillateralmente la independencia si les conversaciones de paz con Israel siguen taramingando. En declaraciones a Reuters, Abed Barr afirmó que si nun puen llegar a un alcuerdu, los palestinos puen considerar la declaración d'independencia, lo mesmo que fizo Kosovo'l pasáu domingu. ""Si les coses nun van na llinia de pone-yos puntu real a los asentamientos, al traviés d'unes charres continues y series, deberíamos dar el pasu y anunciar la nuestra independencia unillateralmente"" dixo'l responsable.

Pela so parte, un voceru de Hamas, movimientu que controla dende'l xunu pasáu la Franxa de Gaza, consideró que la propuesta de Rabbo nun paga la pena nin sentila. ""El nuestru pueblu palestín nun necesita más males esperiencies"", señaló Sami Abu Zuhri."