Vídeo n'homenaxe a Berto Turulla

Esti xueves día tres proyéctase en Xixón un
video que quier recordar a una figura de la música asturiana como
foi Berto Turulla.



Berto Turulla, que tocó en grupos como "Cuélebre",
acompañó a Julio Ramos o Carlos Rubiera, desenvolvió tamién un
proyectu propiu mui innovador pa la época como foi "Turulla",
amás de crear "L'Andecha", esperimentu qu'axuntó bien de músicos asturianos enriba d'un escenariu. La carrera de Turulla acabó va va venti años, cola so tráxica desapaición el 3 d'abril de 1983, y
coincidiendo con esta fecha quier recordase a la persona y al
músicu cola realización d'un vídeo y la instalación
d'una pequeña esposición. La proyección del vídeo,
producíu y realizáu por Roberto Berciano, va ser nel salón
d'actos del antiguu institutu de Xixón a les 20:00 hores esti xueves
tres d'abril, y la esposición va tar puesta nel patiu central del propiu
Antiguu Institutu. Nel vídeo apaecen músicos y personaxes de la
cultura en xeneral que compartieron con elli proyectos musicales o
simplemente lu conocieron, como Xune Elipe, Julio Ramos, Chus Pedro, Daniel
Gutiérrez Granda...etc, qu'espliquen tanto la so
relación col músicu, como cuál yera l'ambiente musical y
cultural que se vivía n'Asturies a primeros de los ochenta, y
sobremanera nel barriu de la Calzada de Xixón.



Nel vídeo tamién apaecen imáxenes del primer
conciertu homenaxe que se-y fizo a Berto depués de la so desapaición. Esti foi'l primer conciertu que se fizo nel estadiu del
Molinón, y daquella 40.000 persones enllenaron el campu del Sporting pa ver a grupos onde tocara'l músicu xixones
como "Cuero Negro" o "Alcotán", amás de
figures como Jerónimo Granda, Julio Ramos, Victor Manuel, Miguel
Ríos, Carlos Rubiera y un llargu etcétera.