L'Ayuntamientu d'Uviéu defiende'l proyeutu de Calatrava

"El conceyal d'Urbanismu del Ayuntamientu d'Uviéu, Alberto Mortera, volvió a dicir esti miércoles que l'equipu de gobiernu local ""va siguir p'alantre"" col proyeutu de les tres torres que l'arquiteutu Santiago Calatrava tien diseñaes pa los terrenos d'El Vascu, pesie a les recomendaciones feches públiques el martes pol Comité Español del conseyu Internacional de Monumentos y Sitios (Icomos).

""Nun vamos tornar al sieglu XIX nin al paleolíticu, dígalo, con tol respetu, un representante del Icomos o lo diga quien lo diga si nun tien competencies, y equí namás les tien el conceyu d'Uviéu y el Principáu d'Asturies"", sorrayó.

""Hai que facer lo que diga la Cuota"", señaló Mortera, calteniendo que'l proyeutu va siguir el procesu hasta'l final, dientro del ""marcu llegal"".

L'informe del Icomos recomienda que nun se llevanten les tres torres de 140 metros d'altor a una media de 200 metros de distancia de la Cámara Santa de la Catedral, Foncalada y Santuyano, catalogaos como bienes de Patrimoniu de la Humanidá.

El conceyal señaló que l'informe pretende ""valtiar el desarrollu y la modernidá urbanística d'Uviéu"". ""Nun vamos a consentilo"", sentenció, al tiempu que criticó al técnicu del Icomos, Víctor Fernández Salinas. Mortera dixo que ""ta claro que l'informe tien calter y vocación preellectoral de dir a la escontra del Partíu Popular""."