Asturies protesta contra la guerra

Una selmana depués d'entamar l'ataque a Irak, siguen les protestes contra la guerra y contra la posición del Gobiernu español nesti conflictu. A nivel institucional, la Xunta Xeneral del Principáucondenó ayeri oficialmente l'ataque militar nuna sesión estraordinaria na que namás el Partíu Popular defendió la postura del Gobiernu español, mientres los demás grupos votaben una proposición non de llei condenando la invasión reclamando una solución pacífica de la crisis.


Yá na cai, esta mañana la Plataforma Contra la Guerra convocaba un paru simbólicu d'un cuartu d'hora en tol estáu, protesta a la que se xuntaben n'Uviéu una concentración énte l'Hospital Central y una manifestación d'estudiantes d'institutos pel centru de Xixón. Mañana va haber concentración pela tarde énte la sé del PP de Xixón na plaza'l Parchís, mientres qu'a les 10 de la nueche los Ayuntamientos d'Asturies van secundar mayoritariamente un corte de la lluz d'un cuartu d'hora.

Pal fin de selmana ta preparándose una acampada en Xixón que tendría per escenariu la Paza Europa, mientres que'l domingu va salir a les 12h
de la Plaza del Ayuntamientu de Noreña una marcha hasta'l cuartel del Exércitu de La Belga, anque la protesta más fuerte espérase pal xueves 4 d'abril, cuando ta preparada una manifestación en Xixón a les 8 y media de la tarde que va acabar nos xardinos del Náutico, enfrente de la escalerona, onde va facese un conciertu.